Me André Michel ki pandan lontan te yon opozan fawouch premye ak dezyèm vèsyon PHTK a fè konnen estrikti li ladan l lan, Sektè demokratik ak popilè, ap prezan nan tout dyalòg k ap fèt sou kriz Ayiti ap fè fas dènye tan sa yo.
Nan yon piblikasyon sou Twitter ayè jedi premye jen an, Avoka pèp la, jan l rete tèt li an, denonse gwoup Montana a ki te boude envitasyon Wo konsèy tranzisyon an pou fowòm sa ki t ap òganize nan Caribe Convention Center an nan dat 23 ak 24 me pase an.
Me André Michel ki pami pèsonalite politik ayisyen CARICOM konvoke nan peyi Jamayik pou diskite sou pwoblèm Ayiti an, kritike gwoup Montana a ki deja konfime prezans li pou rankont sila a pandan yo te inyore pa HCT an.
« Nou t ap parèt pi serye si nou tout te reponn prezan ak envitasyon HCT a jan SDP te fè l. An granmoun, nou t ap chita nan peyi nou, lakay nou, je nan je, pou nou rezoud pwoblèm nou », ekri responsab Sektè demokratik ak popilè a sou kont Twitter li.
Yon lòt bò, Mèt André Michel ki pami pi gwo alye gouvènman Ariel Henry an, kontinye ap fè pwomosyon pou dyalòg ant aktè yo an Ayiti. « Li dwe klè pou tout moun, depi se Dyalòg sou pwoblèm Ayiti, SDP ap ladan l », rapouswiv Me André Michel ki san dout ap Jamayik.
N ap raple, depi plis pase yon dizèn ane, Ayiti plonje nan yon kriz san parèy kote prèske tout enstitisyon yo ajenou, mete sou kriz sosyopolitik yo ki mennen sou yon ensekirite k ap detwi lavi sitwayen ak sitwayèn yo nan peyi a, sitou aprè asasina brital ansyen Prezidan Jovenel Moïse lan.
