Nan lannwit vandredi 16 jen pou louvri samdi 17 jen 2023, moun Tigwav leve jwenn Gupson Jean Francois ap benyen nan san l sou kabann lakay li. Dram sa pase nan lokalite Bazil, dezyèm seksyon vil Tigwav. Daprè enfòmasyon youn nan pitit viktim lan pataje, Gupson Jean Francois alias “Ti Yvon” ta viktim vyolans avan endividi yo pa rive idantifye ta sasinen l .
Responsab lajistis nan tribinal Vyalè te depeche yo pou fè konsta legal yo, se Mèt Merso Bellabre ki te fè konklizyon yo epi ki te bay lòd pou leve kadav la.
Daprè revelasyon youn nan pitit fi viktim lan, ki genyen ant 10 ak 11 lane, moun yo pa t rive idantifye sasinen Gupson Jean Francois alyas “Ti Yvon anba anpil kout kouto. Anvan yo sasinen l, yo bat li, pete zye l, kase janm li.
Yon dram ki plonje tout fanmi an ak kominote a nan yon tristès san fen.Li enpòtan pou n souliye, pete zye yon moun, kase janm li anvan w asasinen l genyen gwo similasyon mistik ki kache dèyè l. Daprè plizyè kwayan, sa kapab anpeche defen an idantifye moun ki touye l lan lè yo rele l sou tab tounant.
