Nan yon sikilè ki pote dat 29 jiyè, administrasyon k ap jere Inivèsite piblik Okap la otorize etidyan nan nivo lisans yo ekri ak soutni memwa yo nan lang kreyòl. Yon dezisyon ki dwe kòmanse aplike apati ane akademik 2022-2023.
Nan sikilè sa, responsab UPNCH yo anonse desizyon sa ki rive aprè plizyè reyinyon ak atelye syantifik inivèsite a te reyalize nan mwa me 2022 sou metodoloji rechèch ak chwa lang pou redaksyon ak soutnans memwa etidyan yo.
«Tout etidyan ki fin suiv tout kou teyorik ak pratik yo nan inivèsite a, avèk akò yon direktè memwa, kapab chwazi prepare, ekri epi soutni memwa li devan yon jiri soutnans nan youn nan de (2) lang ofisyèl an Ayiti yo : kreyòl ayisyen oubyen fransè », sa nou kapab li nan nòt sa ki rive nan redaksyon jounal la madi 2 dawout la.
Responsab inivèsite piblik depatman nò yo garanti ak tout etidyan ki chwazi pwodui yon memwa nan lang kreyòl yon akonpayman lengwistik espesyal, yon fason pou inivèsite a kapab asire l ke kritè ak egzijans akademik sou nivo lang nan travay memwa yo respekte tankou jan sa fèt pou tout memwa ki ekri nan lang fransè.
Daprè rektora inivèsite piblik Okap la, desizyon sa ki dwe rantre an aplikasyon nan ane akademik k ap vini la ap kòmanse avèk Fakilte Syans Edikasyon ki anndan inivèsite a akoz se sèlman nan depatman sa ki gen kou kreyòl nan moman an.
