Dimanch 26 mas 2023 a, plizyè ka kidnapin resanse nan kapital la Pòtoprens. Malgre divès mezi Polis Nasyonal d Ayiti (PNH) adopte pou frennen fenomèn sila nan peyi d Ayiti, li kontinye ap vale teren.
Plizyè moun viktim zak kidnapin nan sant vil Pòtoprens ak sou Delma ayè 26 mas la, se sa nou aprann. Prèske yon dizèn moun kidnape nan avni Christophe ak Avni N, pami yo 2 ki te abò yon machin nan moman yo t ap pral legliz. Bandi ak zam yo pa rive idantifye fè yo desann veyikil la epi pati ak yo, tout sa malgre jefò moun ki te sou plas. Rès viktim yo idantifye tankou jenn etidyan, pami kèk lòt.
Konsa tou, nan komin Delma, omwen yon ka kidnapin siyale nan menm jounen dimanch lan nan maten. Nan nivo Delma 60, bandi mete lapat sou yon antreprenè anndan biznis li.
Se plis pase yon dizèn ka kidnapin ki siyale pou sèlman ayè dimanch lan nan zòn metwopolitèn Pòtoprens lan, alòske sou bò pa Polis Nasyonal d Ayiti (PNH), anonse sou rezo sosyal li yo li dejwe plizyè kidnapin nan menm jounen an nan kapital la.
N ap raple, peyi a ap kouri sou plizyè lane depi fenomèn kidnapin nan kenbe pèp ayisyen an anba gagann, malgre jefò fòs lòd yo pou pote yon solisyon dirab ak sitiyasyon an anyen pa janm fèt. Pyès moun pa epanye anba ensekirite a, pa menm polisye yo k ap tante bay sekirite. Chak jou se omwen youn a 2 ka kidnapin ki resanse, e sa poko prèt pou fini la.
