Lapolis Nasyonal d Ayiti (PNH) ap goumen kont gang ak zam nan peyi a depi plizyè lane. Gang sa yo responsab vyolans, kidnapin ak asasina nan katye pòv yo ak bidonvil yo nan peyi a. Gouvènman ayisyen an ak PNH la entansifye batay yo kont gang sa yo nan dènye ane yo, men pwoblèm nan pèsiste.
Se sak fè, Kolonèl Himmler Rébu ki se youn nan pi bon espesyalis ayisyen nan sekirite piblik fè konnen, enstitisyon polisyè Ayisyèn nan pa antrene pou mennen yon batay kont gang ak zam yo nan peyi a.
Fas ak sitiyasyon sila, ansyen Kolonèl la sikjere pou yo koupe sous zam ak minisyon bandi ak zam yo nan peyi a, ki ap simen latwoublay anndan sosyete Ayisyèn nan, epi teworize popilasyon Ayisyèn nan.
Li enpòtan pou nou note, PNH la travay kole kole ak otorite lokal yo ak kominote yo pou idantifye manm gang yo epi arete yo. lapolis fè operasyon nan katye kote gang yo aktif, sezi zam epi arete kèk sispèk sitou nan kad Operasyon « Tònad 1 » an. Sepandan, batay sa a kont gang ak zam yo konplike akoz ensekirite ak mank resous PNH la.
Kominote entènasyonal la bò kote pa l apiye efò PNH la ap fè pou konbat gang yo nan peyi a. Lèzetazini te bay PNH la asistans teknik ak finansyè pou konstwi kapasite operasyon li, alòske lòt peyi yo te ofri sipò tou. Sepandan, malgre efò sa yo, bandi ak zam kontinye poze gwo defi pou sekirite ak estabilite an Ayiti.
Facebook Comments