Nan yon nòt pwotestasyon ki pote dat 4 avril 2023, Rektora Inivèsite Leta a denonse zak kidnapin ki fèt sou Doktè Junior Daris ak Emmanuel Joseph dimanch 2 avril ki sot pase a nan Dèlma 75 epi mande liberasyon yo san kondisyon, prese prese.
Nan nòt sa ki pibliye sou rezo sosyal yo ayè madi an, Rektora a kondane anlèvman de medsen rezidan Lopital jeneral sa yo ki t ap prepare pou prezante tèz fen etid yo nan kad espesyalizasyon yo nan Medsin entèn.
Rektora inivèsite Leta a di li kondane ak tout fòs li zak sa ki frape yon fwa anplis kominote inivèsite a pandan l eksprime soutyen l ak fanmi viktim yo, kòporasyon medsen yo epi tout rezidan Lopital jeneral yo.
Fas ak sitiyasyon sa k ap vin pi grav chak jou pi plis nan peyi a, Rektora a kwè li lè li tan pou gen yon fren nan fenomèn sa k ap ravaje fanmi yo an Ayiti ki pa kapab ankò. Sou twa premye mwa nan ane a, plis pase 300 ka kidnapin resanse an Ayiti.
Facebook Comments