«Selon Mwen Menm», yon premye albòm solo pou Big Jim 

Jacky Chery
Jacky Chery  - Rédacteur
«selon mwen menm», yon premye albòm solo pou big jim 

Aprè plis pase yon ane ap tann, premye albòm solo Big Jim lan finalman sòti. Pou fèt fen ane a, konsomatè mizik yo, prensipalman fanatik Rap kreyòl yo, ap kapab apresye pwojè sa ki depi anviwon yon semèn disponib sou divès platfòm an liy ki vann mizik yo. 

Yon gwo satisfaksyon pou Big Jim, antouraj li, fanatik Rap kreyòl an jeneral, aprè sòti albòm sa ki gen pou tit «Selon Mwen Menm». Yon pwojè ki finalman ateri yon pakèt tan aprè premye anons yo ki te fèt sou rezo sosyal yo prensipalman, sa gen plis pase yon lane. 

- Advertisement -
Ad imageAd image

Atis la ki pa fin pòte l twò byen dènye jou sa yo, te bay yon entèvyou ak animatè kiltirèl, Gandhi le Métronome, kote l ap eksplike rezon ki fè albòm sa te pran konsa pou rive. Yon albòm li te pèdi avan sòti dènye pa Rockfam lan an 2017, ta youn nan koz reta pwojè sa daprè sa l fè konprann. 

«Selon Mwen Menm», yon albòm ki rive aprè anpil sakrifis, anpil travay, kote atis la eksplike konplikasyon li genyen nan kesyon sante l. «Mwen te fè yon mini stroke an 2021. Gras a dye bagay yo pa pimal jan yo pase a», pawòl Big Jim sou kesyon silans li dènye tan sa yo. 

«Pou m te fini albòm lan mwen te oblije mande Doktè a pèmisyon. Nan moman la, depi Doktè pale avè w ou dwe koute l paske lasante se yon bagay ki pa gen pri. Mw goumen pou m fini albòm sa pou fanatik yo», sa li kontinye pou l di. 

Atròs, yon kavalye pòlka pou Big Jim depi nan Rockfam Lame a, pa kache santiman l sou sòti albòm sa ki, daprè sa l fè konprann se yon rèv ki vin reyalite. «Albòm sa rive sou mwen ak yon santiman fyète, anpil kè kontan, paske se yon albòm pèsòn pa t kwè ki t ap sòti». 

Nan entèvyou sa li bay ak redaksyon Netalkole Media a, Atròs espere albòm «Selon Mwen Menm» Big Jim sòti an pral fè travay li sipoze fè an epi swiv wout li. « Antanke mafya, frè nan mikwo Big Jim, mwen santi m fyè», enpresyon Atròs ki wè albòm sa kòm yon viktwa pou Rap kreyòl ak mizik ayisyèn lan. 

Enpresyon yo pa diferan bò kote lòt moun nou te pale avè e ki te patisipe nan pwodiksyon pwojè sa. Staël, yon manm ekip Rockfam Lame a, fè konnen albòm sa rive sou li ak anpil emosyon aprè tout kalamite Big Jim pase avan l fini ak travay sa. 

«Onètman, se avèk anpil emosyon, anpil kè kontan albòm sa rive sou mwen. Mwen vrèman kapab di yon moun ki difikilte, ki kalamite Big Jim pase, ki obstak li fè fas avan li reyisi pwojè sa. Se sa k fè mw te bay tout mw menm, bliye tèt mw pou m te ka ba l lanmou sa, sipò sa», sa li konfye nou. 

«Selon Mwen Menm», yon albòm ki ta sipoze siyen an Ayiti daprè tou de responsab nou kontakte yo, men akoz reyalite peyi a ki pa estab, rann poko gen okenn dat ki fikse. Annatandan, Staël, Atròs, envite piblik la, prensipalman fanatik Rap kreyòl yo, pou al tande albòm lan, achte l sou divès platfòm an liy yo. 

 

Facebook Comments

- Advertisement -
Partagez cet article
Jacky Chery
Par Jacky Chery Rédacteur
Follow:
Étudiant en Communication Sociale et en Sciences Juridiques à l'UEH, également Journaliste-redacteur à Netalkole Media. Un passionné de l'écriture et de la lecture.