TonyMix anonse li pa p jwe pou katye popilè ankò aprè l fin mande fanatik li yo eskiz

Jacky Chery
Jacky Chery  - Rédacteur
tonymix anonse li pa p jwe pou katye popilè ankò aprè l fin mande fanatik li yo eskiz

Aprè pil pale sou prezans li anndan Vilaj de Dye sou rezo sosyal yo pandan semèn sa, TonyMix anonse li pa p jwe pwogram anndan katye popilè ankò nan yon dirèk li fè sou rezo sosyal Instagram vandredi 30 desanm lan.

Nan videyo sa k ap vire sou tout rezo sosyal yo, Tony Mahotière moun plis konnen sou non TonyMix anonse desizyon sa li pran an aprè li te fin resevwa anpil kritik sou rezo sosyal yo akoz prezans li nan Vilaj de Dye pou jwe nan yon pwogram gwoup ame «5 segond» t ap òganize 25 desanm pase an.

- Advertisement -
Ad imageAd image

DJ an ki t ap eksplike an detay sa k te pase an, fè konnen se sou gwo presyon li te rive desann sou Bisantnè a pou al jwe pwogram sa kote gwoup ame ki kontwole zòn sa te rele l a 2 zè nan maten pou desann nan Vilaj vin jwe.

TonyMix ki te klèman pa t apresye kritik sa yo l ap resevwa depi jou sa a, lonje dwèt sou mesyedam ak zam sa yo ki jounen jodia mete l nan yon pozisyon kote li oblije ap jistifye l sou prezans li anndan Vilaj de Dye. Daprè atis la, li pa t gen chwa.

Izolan ki se lòt atis ki te prezan nan pwogram sa tou, ale nan prèske menm sans lan ak TonyMix pou fè konnen reyalite a an Ayiti pa pèmèt yon moun refize gwoup ame sa yo ki kontwole prèske tout rejyon metwopolitèn lan. Pou ansyen rapè Barikad Crew an, se pawòl li te gen ak gwoup ame sa yo li te al onore nan Vilaj la avèk lapè yo anonse yo fè nan twazyèm sikonskripsyon an.

TonyMix yo te idantifye kòm atis ki pi lach nan Endistri mizikal ayisyen an pandan pwogram sa, fè konnen se pa yon lachte, men pito pridans akoz fanmi l, pwòch li ki toujou ap viv Ayiti. DJ an ki fè konnen menmsi si ap koute l vi l, li pa p jwe pwogram nan katye popilè ankò toutan Leta ayisyen pa retabli lòd ak sekirite nan zòn sa yo.

DJ an moun plis konnen l atravè mizik rabòday li yo ki trè popilè nan mitan jenès ayisyen an, prensipalman jenerasyon 2000 lan, te sòti pandan ete an «Alo Leta», yon mizik ki gen karaktè sosyal pou te kesyone absans otorite yo ki pa anmezi pou mete sekirite nan peyi an.

 

Facebook Comments

- Advertisement -
Partagez cet article
Jacky Chery
Par Jacky Chery Rédacteur
Follow:
Étudiant en Communication Sociale et en Sciences Juridiques à l'UEH, également Journaliste-redacteur à Netalkole Media. Un passionné de l'écriture et de la lecture.