Se tout monn lan ki koube anba Messi aprè l fin fè eksplwa ranpòte Mondyal 2022 a. Depatman espò nan vil Rio de Janeiro menm envite l kite mak pye l nan estad Maracana a.
Yon jwè Ajaten k ap kite anpwent li nan estad ki pi mitik nan peyi Brezil la, sa posib. Depatman espò nan vil Rio de Janeiro ta byen renmen sa fèt avèk Lionel Messi aprè tit Mondyal li sot pran nan peyi Kata a.
Lejand Ajaten an ta dwe kite mak pye l nan « Hall of Fame » estad mitik sa kote li te pran premye twofe avèk peyi, Copa America 2021 an. Se la tou l te jwe premye final Koupdimonn li nan lane 2014 e l te konnen yon defèt anfas Almay (0-1 a.p.).
Oganis piblik la te gentan fè kapitèn Albiceleste a demand lan depi aprè dènye Copa America a. Si tout fwa sa rive fèt, Messi ap gen mak pye l bò kote anpil lejand tankou Pelé, Garrincha, Rivelino, Ronaldo, Eusebio oubyen Franz Beckenbauer.
