William O’Neill, yon avoka meriken nonmen mèkredi 12 avril la pa chèf Dwa Moun Nasyonzini an kòm Ekspè Dwa Moun an Ayiti, apre yon demann Konsèy Dwa Moun nan Nasyonzini an.
William O’Neill se yon avoka meriken ki espesyalize nan lwa refijye yo te travay depi lontan sou etablisman an ak antretyen nan règ lalwa nan sitiyasyon konfli. Misye O’Neill te Konseye senyò Dwa Moun nan Misyon Nasyonzini an nan Kosovo, Chèf Operasyon Dwa Moun Nasyonzini an nan Rwanda e Chèf Depatman Legal Misyon Nasyonzini/OEA an Ayiti.
Daprè Nasyozini, William O’Neill te ede nan etabli Polis Nasyonal Ayiti a (PNH) nan lane 1995, bay konsèy sou rekritman, tès ak fòmasyon nouvo fòs polis la, li te patisipe tou nan kreyasyon Lekòl Jij. Li te travay kole kole ak òganizasyon dwa moun ayisyen pou ede fòme monitè yo.
Dapre Rezolisyon A/HRC/52/L.17/Rev.1, ekspè an pral responsab pou kontwole, avèk asistans Biwo Komisyonè Segondè pou Dwa Moun (OHCHR), an kolaborasyon ak Biwo Nasyonzini Entegre an Ayiti a (BINUH), evolisyon sitiyasyon dwa moun an Ayiti, nan egzekite devwa li yo, li pral bay yon atansyon patikilye sou sitiyasyon timoun ak trafik moun.
Li pral bay tou konsèy ak asistans teknik ak gouvènman ayisyen an, enstitisyon nasyonal dwa moun ak òganizasyon nan sosyete sivil la, epi ede yo nan efò yo pou asire respè, pwomosyon ak pwoteksyon dwa moun.
Rezolisyon an mande tou Biwo Komisyonè a pou bay gouvènman ayisyen an asistans teknik ak sipò pou ranfòse kapasite nan pwomosyon ak pwoteksyon dwa moun, an patikilye pou jistis ayisyen an, fòs sekirite ak ‘Administrasyon penitansye a.
Dapre biwo wo komisyonè a, Volker Türk, travay Misye O’Neill fè a pral kontribye nan yon rapò alekri pwovizwa wo komisyonè a pral prezante bay Konsèy Dwa Moun nan, nan senkant-katriyèm sesyon li a ak yon rapò konplè sou sijè sa a nan senkant-senkyèm sesyon li yo.
Facebook Comments