Lionel Messi ki gen anpil posiblite pou ta retounen nan FC Barcelone aprè fen kontra li ak Paris Saint-Germain ete sa, resevwa yon gran omaj ki sòti bò kote fanatik katalan yo ki t ap resevwa Real Madrid.
Nan demifinal retou Koup Espay, fanatik katalan yo ki ta swete wè Lionel Messi sou koulè blaugrana yo yon lòt fwa, te kase randevou jodi mèkredi an fas Real Madrid nan Camp Nou an pou chante non Pulga an nan 10èm minit match la.
Jan sa te anonse an, sipòtè katalan yo pa t kite opòtinite sa pase pou rann omaj ak jeni ajanten an ki make istwa blaugrana yo pandan plis pase 20 lane ap pote koulè FC Barcelone avan li ta pral travèse nan Paris Saint-Germain an 2021.
Kèk jou aprè yon gwoup fanatik klèb parizyen an ta pral rele chalbare dèyè atakan ajanten an nan match fas Olympique Lyonnais an (0-1) nan Ligue 1 an, sipòtè katalan yo fè jès sa jodi mèkredi an nan Clasico an pou montre lanmou yo kontinye genyen pou Lionel Messi.
