Gad Kòt Ameriken rapatriye madi 20 desanm 2022 a 110 Ayisyen ki t ap eseye antre Ozetazini ilegalman.
Daprè enfòmayson otorite lokal yo, pami 110 imigran Ayisyen sa yo, genyen 82 gason, 22 fanm 6 minè. Vwayaj klandesten sa a te planifye sou zile Latòti nan dat ki te 14 Desanm 2022 a, pou direksyon peyi Tonton Sam nan.
Ensekirite, chomaj ak lavi chè ki gen nan peyi a se kèk nan eleman moun sa yo mansyone pou jistifye dezi yo genyen pou kite peyi a. Kidonk imigran sa yo mande otorite yo pou kreye kondisyon sosyo-ekonomik akseptab pou yo ka rete viv nan peyi a.
Nimewo 1 Biwo Nasyonal Migrasyon an (ONM) nan vil Okap, Kerwin Augustin, bay migran sa yo lajan pou yo retounen lakay yo, epi li dekouraje yo pou yo pa riske vi yo nan gwo lanmè, pou ale nan lòt peyi. Li fè yo konnen chans pou yo rive nan destinasyon trè ba.
