Ayiti, yon ti teritwa nan rejyon Karayib la, fè fas ak anpil defi sou wout devlopman. Ladan yo, trafik moun parèt kòm youn nan pwoblèm ki pi ijan e ki pi mangonmen. Fenomèn sa a ki gen konsekans devastatè sou sosyete ayisyèn lan, anpeche efò pou amelyore kondisyon lavi abitan yo e pou konstwi yon avni ki pi estab.
Trafik moun an Ayiti pran diferan fòm, soti nan eksplwatasyon seksyèl ak trafik timoun, nan travay fòse ak esklavaj domestik. Viktim yo souvan vilnerab epi majinalize. Yo bloke nan yon sik vyolans ak eksplwatasyon ki prive yo de dwa fondamantal yo epi afebli diyite yo.
Plizyè faktè kontribye nan pèsistans pwoblèm sa an Ayiti. Povrete toupatou, inegalite sosyal, enstabilite politik ak mank sistèm pwoteksyon adekwat ki kreye yon tè fètil pou trafik moun. Anplis de sa, pwoksimite jeyografik Ayiti ak lòt peyi Karayib yo ak Etazini fè li yon sib privilejye pou rezo trafik.
Kòm prèv, 22 sispèk kontrebann, enkli Dominiken ak Ayisyen, te arete abò yon bato nan Bahamas Dimanch ki sot pase a, dapre otorite Bahamas yo. Yo sispèk moun sa yo patisipe nan yon rezo trafik moun.
Yon lòt bò, Fanm ak timoun se prensipal viktim trafik sa. Jèn fi yo souvan atire nan fo pwomès travay oswa pi bon opòtinite aletranje, sèlman pou yo fòse yo nan pwostitisyon. Mete sou sa, yo eksplwate timoun yo nan travay fòse, sitou nan plantasyon agrikòl, atelye ak kay fanmi ( Les Maisons de Famille).
Gouvènman ayisyen an, konsyan de grandè pwoblèm lan, men pa janm pran mezi konkrè pou konbat trafik moun. Sepandan, yo pran lwa pou kriminalize pratik sa e yo lanse kanpay sansibilizasyon pou enfòme popilasyon an sou danje trafik yo ak dwa viktim yo.
Sepandan, malgre jefò sa yo, anpil defi rete. Koripsyon, inefikasite sistèm judisyè a ak mank resous kontinye konpwomèt lit kont trafik moun nan peyi a. Anplis de sa, estigmatizasyon sosyal sivivan trafik yo sibi fè li difisil pou yo reyentegre nan sosyete a.
Pou mete fen ak flewo sa, li esansyèl pou Gouvènman an ranfòse mezi prevantif, pouswiv ak kondane trafikè yo, epi garanti ase asistans ak pwoteksyon pou viktim yo. Ogmantasyon koperasyon entènasyonal yo, ansanm ak envestisman nan devlopman ekonomik ak sosyal Ayiti, esansyèl tou pou diminye faktè sa yo ki alimante trafik moun nan peyi a.
An konklizyon, trafik moun reprezante yon gwo defi pou Ayiti, li anpeche devlopman li epi konpwomèt byennèt sitwayen li yo. Batay kont flewo sa mande aksyon kolektif ak kowòdone nan men gouvènman ayisyen an, òganizasyon entènasyonal yo ak kominote mondyal la. Se sèlman yon apwòch olistik sa vle di yon apwòch global k ap mete fen nan vyolasyon dwa moun sa epi bay Ayiti opòtinite pou bati yon pi bon avni pou tout popilasyon Ayisyèn lan.
Facebook Comments