Lidè Kominote Karayib yo (CARICOM) mande pou ranfòse polis nasyonal peyi Ayiti, deklarasyon sa te fèt nan 44triyèm somè anyèl ki te òganize nan Peyi Bahamas nan dat vandredi 17 fevriye pase a, otorite CARICOM yo te deklare nan okazyon an yo dwe jwe yon wòl prensipal nan rezoud kriz k ap travèse Ayiti a.
“Nou te pran oserye obligasyon moral nou yo pou n ede rezoud pwoblèm yo an Ayiti, epi premye etap la pral wè ki jan nou dwe ranfòse polis ayisyen an pou retabli lòd ak kwape aktivite kriminèl yo,” deklarasyon Premye Minis Bahamas epi Prezidan Caricom nan, Phillip Davis nan yon konferans pou laprès.
“Nou espere rankontre pi vit posib ak moun ki gen enterè an Ayiti, reprezantan Caricom epi petèt yon patnè entènasyonal pou diskite sou fason nou ka ranfòse polis nasyonal Ayiti a,” se deklarasyon Phillip Davis.
Kanada se youn nan peyi kote Caricom mande èd epi Premye Minis li a, Justin Trudeau, se te youn nan envite entènasyonal yo nan 44triyèm somè òganizasyon rejyonal la.
Responsab Caricom lan eksplike li esansyèl pou polis nasyonal Ayiti a gen bon jan resous, tankou pwovizyon manje, peye salè yo kòm sa dwa ak plis twoup.
Manm Caricom yo se Antigwa ak Babida, Barbade, Bahamas, Belize, Dominique, Grenade, Guyane, Ayiti, Giyàna, Jamaïque, Montserrat, Saint Kitts-Nevis, Sainte-Lucie, Saint-Vincent-et Grenadines, Trinité-Tobago, Suriname
