« Depi w lèd rete lakay ou » yon fòm presyon pèp la pran oserye

Witson Beaujour
Par Witson Beaujour  - Rédacteur
imaj sa a pa pwopriyetè netalkole média, se yon seri imaj ki pibliye sou rezo sosyal yo pou ilistre mesaj popilasyon an vle voye a

Koze depi w lèd rete lakay ou pa mache ta a, te konn pale anba anba sou fòm blag oubyen pou fawouche moun, depi aprè pèp Kanapevè a te fin leve sou brenzeng yo jiskaske yo te menm rive bat epi boule 14 prezime bandi ki t ap sikile ak zam ak bal nan valiz yo, zafè « depi w lèd ret lakay ou » a vin yon reyalite pandan semèn sa a.

Kòmanse sou seri deklarasyon sitwayen yo ki te patisipe nan mouvman ki te mennen lanmò mesye yo fini sou rezo sosyal yo, bagay la vin pran ekstansyon yon fòm presyon nan lide pou kwape bandi andedan peyi a, pèp la vin san pitye, aprè yo te fin touye 14 nan swadizan bandi ki soti nan baz Ti Makak la ki t ap pran direksyon Vilaj De Dye ak Gran Ravin, anpil lòt zòn leve sou kòlè yo tou pou kontrekare bandi nan zòn yo.

Sou kèk gwoup WhatsApp, bagay la depase nivo eslogan oubyen challenge, divès moun ilistre deklarasyon an ak kèk vizaj moun ki petèt renmen pibliye foto yo san prete atansyon ak figi yo, oubyen ki genyen yon vizaj ki andomaje… « Nan moman an la, yon moun depiw pa bèl gason pa mache nan zòn k ap manje grenn bandi » se deklarasyon kèk endividi.

« Depi w sanble ak sa [imaj], rete lakay ou » deklarasyon nou te li sou yon imaj.

Deklarasyon yo bay tandans vyolans, gen moun ki menm entèdi enkoni rantre nan zòn yo, pandan jounen tansyon an gen yon sitwayen ki menm deklare menm mennaj pa mache kay mennaj  » jodi a li klè pa gen bagay mennaj k ap regle la, peyi a pa bon rete lakay nou, nou nan misyon la ».

Depi aprè Ministè Jistis fin anonse fwa pase a tout moun dwe defann tèt yo a, pèp la vin pi vyolan… Li klè, nan nivo pèp la ap fè wè revanj li a, nenpòt inosan kapab viktim, nenpòt moun ki swadizan nan kont ak yon lòt sou nenpòt fòm nan kapab viktim, solisyon an pou pèp la se fason l ap fèt jodi a, li vin plis enpòtan pou lapolis swiv tout entèvansyon popilasyon an ni de prè, ni de lwen, epi pou moun k ap sikile nan nenpòt katye fè prèv sitwayènte l, mache kòrèk ak tout pyès ou nan menw, evite nan kont ak moun ou pa konnen, paske prekosyon pa kapon.

Facebook Comments

- Advertisement -
Partagez cet article
Witson Beaujour
Par Witson Beaujour Rédacteur
Witson Beaujour, journaliste-rédacteur, chanteur, musicien et mécanicien industriel. Passionné de reportages, de documentaires et de lecture.