Eske koutim soup joumou an ap respekte kòm sa dwa pou premye janvye 2023 a? 

Kethia Saint Marc
Kethia Saint Marc  - Rédactrice
eske koutim soup joumou an ap respekte kòm sa dwa pou premye janvye 2023 a

Soup joumou se yon koutim chak premye janvye kay pèp Ayisyen. Se yon epòk Kote moun ap pataje soup youn ak lòt, ou kapab remake yon kontantman san parèy kay chak fanmi Ayisyen. 

Menm si yo ta travèse yo ane difisil, men sa pa anpeche yo toujou kenbe koutim sila chak premye janvye. 

- Advertisement -
Ad imageAd image

Daprè konsta tout moun kapab fè, ane 2022 a, se youn nan ane ki pi difisil popilasyon ayisyèn nan te ka konnen. Ak kesyon ensekirite a k ap vale tèren sou teritwa nasyonal la, pwoblèm gaz, epi pri pwodwi premye nesesite yo ki pa sispann monte disèt wotè. 

Daprè deklarasyon kèk sitwayen, menm kantite fanmi ki te konn gen abitid fè soup joumou chak ane yo, ap redwi. Se pou rezon sa a ekip Netalkole a te fè yon ti batbouch ak kèk ti machann pou nou te ka sètifye koman kesyon soup joumou pou premye janvye 2023 a ap ye. 

 » Tout moun konsyan kòman ane 2022 a te difisil anpil, sitou ak kesyon lavi chè a ki prèske ap bat tout moun. M pa preske wè posibilite soup joumou an non, bon kanmenm gen moun k ap fòse fèl men pou mw li pap jan m menm fason an », deklarasyon Nathalie yon ti machann k ap chèche kote lavi fè kwen. 

 » Bon pou mwen menm, m wè li posib pou soup la toujou fèt, sèlman moun yo ap depanse plis kòb. Epi nan tout peyi nan mond lan, yon koutim rete yon koutim. Nou pa ka kite pwoblèm peyi a fè nou abandone tout koutim nou yo. Dayè se yo menm ki fè fyète nou antanke pèp », deklasyon yon lòt ti machann ki bò kote pal soup joumou an posib. 

Daprè konsta nou te ka fè nan divès mache, majorite ayisyen pa dakò negosye premye janvye yo, malgre lavi chè a ap fè yo monte le syèl pa do. Daprè deklasyon anpil nan yo se yon dat ki make listwa, yo pa dakò sousi lavi vin gate l nan men yo. Poutan yon lòt bò gen moun ki pa vrèman wè posibilite a. 

Ki kote orijin soup joumou an soti ? 

Soup joumou an konsidere kòm yon manje pou selebre endepandans peyi a ki te pwoklame nan dat premye janvye 1804. Fòk nou di nan epòk kolonyal la, se te sèlman chèf fransè yo ki te gen aksè pou bwè soup sa ki te yon enpòtans kapital, esklav yo pat gen chans sa a, malgre se te yo menm ki te konn plante l. 

Men pou zansèt yo te ka siyen endepans peyi a, madanm anperè Dessaline nan te pase lòd pou tout moun san distenksyon bwè soup joumou an, pou montre tout peyi nan mond lan espesyalman lafrans, Ayiti se yon peyi ki lib. Ki fè jouk kounye a, soup joumou an rete kòm yon koutim depi plizyè lane. 

 

Kethia Saint Marc

Facebook Comments

- Advertisement -
Partagez cet article
Kethia Saint Marc
Par Kethia Saint Marc Rédactrice
Follow:
Journaliste rédactrice, institutrice, maîtresse de cérémonie, diplômée en informatique ,passionnée de la présentation ainsi que l'animation.