Depi fen avril, ensekirite a bese nan yon nivo ki konsiderab anpil: pa gen ka asasina ki resanse, prèske pa genyen kidnapin, ni vòl ak vyòl. Tout bandi yo sanble rantre tèt yo nan twou.
Mouvman popilè a kòmanse tabli yon asirans kay popilasyon an ki reprann aktivite l prèske menm jan ak oparavan. Menm si lari Pòtoprens poko ka reprann manm, sitou lèswa, men sa pa anpeche kèk aktivite reprann kòrèkteman. Men yon sèl kesyon k ap poze: Èske n ka espere jwenn yon lapè an pèmanans aprè “Bwa Kale” a fin pase?
Wi, plizyè sitwayen eksprime enkyetid yo genyen jiskaprezan sou jan bagay yo ap dewoule reyèlman, e pi fò nan yo pè pou volonte ki gen nan lari a pou trake bandi yo pa febli. Paske peyi d Ayiti pral kouri sou omwen 4 lane la li pa janm konn sa ki rele yon lapè dirab akòz ensekirite a, san konte avan sa anyen pa t miyò, e mete sou sa twoub sosyopolitik ki t ap sakaje bil pèp ayisyen an.
Toutfwa, menmsi atmosfè a vin pi detann, li vin pi frajil tou an rezon pèp la ki di l fatige ak ensekirite a. Se youn nan prensipal rezon li deside pran batay la an men. Lapolis rejwenn li ladan l pou chache bandi yo nan tout rakwen teritwa a.
Sòti 24 avril dat ki make lansman “Bwa Kale” a nan Kanapevè, pou rive jounen jodia, se plizyè dizèn bandi ki mouri oswa jwenn arestasyon yo. Men sila ki tonbe anba men popilasyon an pa sòti vivan.
Pou kounya a, tout aktivite ap reprann piti piti. Tout moun ap mache sou 13 yo pou yo pa viktim, men pou konbyen tan ankò sitiyasyon an ap rete konsa? Èske aprè “Bwa Kale” a popilasyon an ap gen yon lapè tout bon vre sou teritwa a?
