Etazini ak Kanada sanksyone plizyè wo diyitè ayisyen, Ariel Henry rete bèkèkè 

Pooshy Rosana
Pooshy Rosana  - Rédacteur
etazini ak kanada sanksyone plizyè wo diyitè ayisyen, ariel henry rete bèkèkè 

Sa gen plizyè semèn depi Lèzetazini ak Kanada te pran angajman pou mete anba sanksyon plizyè wo diyitè pa bò isit an Ayiti pou enplikasyon yo nan move zak tankou koripsyon ak finansman gang pou simaye latwoublay. Si tou lè 2 peyi sa yo deklare pou kounya « se gouvènman ayisyen an ki pou pran bon jan pinisyon kont moun sila yo, jiskaprezan Premye minis peyi a rete bèkèkè. 

Ariel Henry pako janm sòti nan silans li pou pwononse l sou divès akizasyon ki peze byen lou sou do alye li yo ki te nan gouvènman an, pami yo 2 ansyen minis, ki se Berto Dorcé ak Listz Quitel. 

- Advertisement -
Ad imageAd image

Chèf gouvènman an – aprè plizyè mwa peyi a te bloke nan men l akòz pèp la t ap revandike dwa pou l jwenn pi bon kondisyon vi – t ap pral mande kominote entènasyonal la pote l sekou ak yon entèvansyon militè aprè bandi G9 te pran kontwòl youn nan pi gwo sant estokaj pwodui petwolye peyi a, tèminal Varreux ki nan Site Solèy. Mete sou sa, genyen lòt kote nan zòn metwopolitèn Pòtoprens lan ak nan vil pwovens yo ki te tonbe anba grif gang ak zam. 

Aprè plizyè tantativ pou te fè yon entèvansyon nan peyi d Ayiti, kèk peyi pami yo Lèzetazini ak Kanada te deside pran mezi pou sanksyone, atravè Nasyonzini, yon ventèn chèf gang k ap opere pa bò isit. Pi lwen, yo te menm rive mete gwo kòb sou tèt plizyè manb aktif gang 400 mawozo ki gen nan tèt li Wilson Joseph alyas “Lanmò San Jou”. 

Toutfwa sa pat sifi, ak yo 2 a Lèzetazini ak Kanada te kòmanse pran bon jan mezi pou sezi byen, friz avwa ak koupe viza plizyè gwo tèt k ap finanse gang nan peyi a. Konsa Joseph Lambert, Youri Latortue, Gary Bodeau, Rony Célestin, Hervé Fourcand, ansyen prezidan Michel Joseph Martelly ak 2 ansyen premye minis li, Laurent Salvador Lamothe ak Jean Henry Céant, tout te tonbe anba sanksyon. N ap raple, 3 dènye yo sèlman tonbe anba sanksyon peyi Kanada. 

Malgre divès akizasyon yo genyen sou do yo, pyès nan moun nou sot site la yo pa plede koupab. Yo tout fè konnen yo inosan, « akizasyon sila yo se nan objektif pou sal imaj yo ak detwi karyè politik yo ». 

Jounen jodia si Lèzetazini ak Kanada di yo fè travay pa yo a deja se gouvènman aktyèl la ki pou pran lamayòt la, nan vwa aktyèl mini Jistis ak Sekirite Piblik la, Emmelie Prophète Milcé, pouvwa anplas la te deklare nan dat 24 novanm pase a,« l ap travay san pran souf pou jwenn pi meyè fason li ka rekipere dosye moun Lèzetazini ak Kanada sanksyone yo ». 

Titilè MJSP a te deklare: « Ajitasyon ki gen nan medya yo pa vo rezònman legal yo. Nap travay sou pi bon fòmil pou abòde pwoblèm nan, pou gen yon kominikasyon nan dosye a paske li enpòtan pou nou konnen rezon ki fè pèsonalite sa yo te sanksyone. Pou sa, plizyè avoka ap reflechi kounye a pou idantifye pi bon fason pou yo kontinye sou dosye a. » 

N ap raple, genyen anpil pale jiskaprezan suit ak desizyon Lèzetazini ak Kanada pran pou sanksyone plizyè pèsonalite sou sèn politik la an Ayiti pou enplikasyon yo nan trafik dwòg, koripsyon, blanchiman lajan ak finansman gang ame. Anpil moun ret kwè lis sila poko fin. 

Yo denonse, yon lòt kote, silans lokatè Primati, Ariel Henry ki poko janm fè pyès entèvansyon sou dosye sila, epi yo ale pi lwen pou di menm PM nan tou enplike nan ensekirite aktyèl la, kisa kominote entènasyonal la ap tann pou mete l nan lis moun ki sanksyone yo. 

 

Facebook Comments

- Advertisement -
Partagez cet article
Pooshy Rosana
Par Pooshy Rosana Rédacteur
Follow:
Pooshy Rosana, journaliste-rédacteur à Netalkolemedia, caricaturiste et graphiste. Parallèlement, coach fitness. Adore la culture populaire, les documentaires et la musculation.