Nan vil Jérémie, manifestasyon yo ap rapouswiv, toujou nan menm sousi a, pwoteste kont lavi chè a ki pa sispann fè yo monte lesyèl pa do, nan mouvman jodi a se pat sèl barikad, kawotchyou ki tap boule, mobilizasyon an te konvèti an dechoukay jounen 7 septanm 2022 sa a.
Sitwayen yo move kou kong, pawòl piman bouk pat sispann klenyonnen pandan tout mouvman an nan degwann Ariel Henry jiskaske plizyè magazen manje nan vil sa a ta pral piye.
Jan sa te anonse a, jounen mèkredi sa a se tap jounen aksyon, sitwayen vil Powèt yo te pile makadanm nan pou mete revandikasyon yo fas ak gouvènman aktyèl la, pandan tout vwayaj yo, manifestan yo bloke trafik la epi boule kawotchou ak pye bwa nan plizyè ri nan vil Jérémie an, selon sa konfrè nou nan Radio Méga konfime pou redaksyon an.
Mouvman an chanje faz nan vil Jérémie an, manifestan yo piye yon bon kantite makèt. « Nou te di yo sa deja, depi Ariel pa kite pouvwa a lap jwenn tout bagay an sann, se li ki responsab tout sa nap viv la, nou paka manje », deklarasyon youn nan pwotestatè yo.
Aprè kèk tan, kèk bakòp polis ta pral pran kontwòl sitiyasyon an, manifestan yo te pran sak diri, bwat savon, espageti, lèt ak lòt pwodui nesesite ankò, selon sa sous lokal nou rapòte.
Toujou selon sous nou, ensidan yo anrejistre nan nivo senk konpayi ki chita nan riyèl Stenio Vincent an. Jiska minit nap ekri la a, sèn piyaj yo ap kontinye nan vil Jérémie an.
Yon dosye nap swiv…
