Jounen madi 19 desanm lan, popilasyon jiridiksyon Miragwàn nan foule beton an pou egzije lajistis retire lèt blam yo te voye bay komisè Jean Ernest Muscadin an, aprè takotak li menm avèk komisè jiridiksyon Okay la, Ronald Richemond.
Efektivman, aktyèl minis jistis la, Emmelie Prophète, te adrese 2 lèt blam ak 2 komisè yo ki daprè li pwouve yon mank pwofesyonalis nan kad travay y ap egzèse kòm komisè gouvènman. Nan kout je redaksyon an fè sou 2 lèt yo, ministè jistis blame komisè Miragwàn lan paske li pa t gen pyès akreditasyon pou l te mennen yon operasyon ki si enpòtan konsa nan yon jiridiksyon li pa p dirije.
Nan sans sa, popilasyon Miragwàn lan fache kou kong. Daprè sa yo di, minis Emmelie Prophète anvizaje livre Miragwàn ak alantou l yo bay bandi
Yo te plis pase yon santèn abitan komin sila ki te mache nan plizyè rakwen. Plizyè pawòl piman bouk t ap klewonnen nan kad manifestasyon sa pou egzije lajistis wè bagay yo pito an favè komisè gouvènman Miragwàn lan.
Yon lòt bò, yo mande pou minis Emmelie Prophète kite ministè l ap dirije a pou enkonpetans ak sitirè gang, daprè ansanm deklarasyon yo.
Malgre tan an t ap fè demwazèl, pwotestatè yo pa t mete dlo nan bouch yo pou denonse minis jistis la ki daprè yo menm pa ekri an favè komisè Jean Ernest Muscadin.
Facebook Comments