Ki solisyon sanksyon yo ka pote nan lavi politik Ayiti ? 

Mackendy Filderice
Mackendy Filderice  - Rédacteur
ki solisyon sanksyon yo ka pote nan lavi politik ayiti  

Kanada ak Etazini  kontinye ap sanksyone manm elit politik ayisyen an. Daprè peyi sa yo, moun sa yo ap itilize estati yo kòm ansyen oswa aktyèl detantè biwo piblik pou pwoteje ak pèmèt aktivite ilegal gang kriminèl ak zam yo, sa ki gen ladan l blanchi lajan ak koripsyon. 

Se sa k fè  pou kè k politisyen ak kèk òganizasyon, sanksyon sa yo kapab pote anpil byenfè nan lavi politik peyi a, sa ki ap kapab finalman trase wout la pou bon gouvenans ak responsablite nan peyi a, sa ki pral pèmèt tou, lajan peyi a sèvi pèp ayisyen an. 

- Advertisement -
Ad imageAd image

Nan yon entèvyou ak redaksyon Netalkole Media, Senatè Patrice Dumont fè konnen, si Etazini kontwole gwo lajan sal k ap sot an Ayiti epi pa fè enjerans nan politik peyi a, menmjan li veye aktivite dwòg nan monn lan, l ap fè yon gwo pa nan bèl relasyon tou nèf Ayiti bezwen genyen avèk li a. 

“Kidonk, si sa Kanada ak Etazini di ki fè yo sanksyone  tout politisyen ayisyen sa yo se la verite, kòb peyi d Ayiti ka rive sèvi pèp la anfen”, se deklarasyon senatè a, tout pandan li di  menm si sanksyon sa yo jistifye oubyen yo pa jistifye, sistèm koripsyon double vyolans gang lan genyen plis moun toujou.  

Mete sou sa, senatè a fè konnen pase nan Dwàn, DGI, nan Ministè Finans, CNMP, Antrepriz Piblik yo, palman, tout enstitisyon sa yo melanje ak gwo raketè sektè prive entènasyonal. Se sak fè Mesye Dumont di  travay la anpil. 

“Pèp la bezwen viv, ekip mafya a mare bouch li ni pou l pa manje, ni pou l pa pale. Tout sa w tande a, atansyon, fò sosyete ayisyen an, menmjan ak politisyen ki pa kowonpi, ansyen tankou sila k ap vini, si yo pa mete bon estrateji ak kouraj pou fè faskare ak vòlè, kanpe ak lajistis tennfas, se pral lave men siye atè”, te konkli Senatè Patrice Dumont, nan yo  entèvyou ak redaksyon Netalkole.
 Wout pou bon gouvenans ak responsablite 

Fondasyon Je Klere (FJKL) nan yon rapò fè konnen sanksyon Kanada ak Etazani pran kont kèk politisyen Ayisyen yo reprezante yon bon opòtinite pou Ayiti. Dapre FJKI sanksyon sa yo kapab finalman pave wout la pou bon gouvenans ak responsablite nan peyi a. 

Vrèman vre, aprè divès sanksyon Etazini ak Kanada te enpoze sou ansyen ak aktyèl lidè ayisyen yo, Fondasyon Je Klere (FJKL) fè konnen yo dwe ekskli moun non yo site nan koze sanksyon yo nan pwochen eleksyon yo. 

Nan sans  sa a, FJKL kwè sanksyon yo ap gen yon enpak sou nivo politik la tou. “Pwochen dekrè elektoral la dwe gen ladan I yon dispozisyon ki kapab ekskli moun ki pran sanksyon nan pwochen eleksyon yo”, deklare Fondasyon an, tout pandan li fè konnen sa ap rann eleksyon yo pi kredib. 

Fondasyon Je Klere di tou renouvelman pèsonel politik yo pral pwobableman fèt ak gason ak fanm ki pi onèt. Daprè oganizasyon dwa moun nan, pèp ayisyen an ap gen chans chwazi pi bon kandida pou renouvle klas politik la. 

 Idantifye politisyen k ap fè move zafè 

“Sanksyon Kanada ak  Etazini pran kont politisyen Ayisyen yo  ap ede idantifye politisyen ki sèvi ak estati yo pou komèt zak òtodòks,” te di ekonomis Eddy Labossière.  Pwofesè inivèsite a deklare l ap sipòte nenpòt apwòch ki vize  pou pini moun sa yo  ki sanksyone. 

“Ekonomi kriminèl la ap grandi anpil an Ayiti. Lèzetazini ak Kanada idantifye klèman pou nou politisyen kwochi yo,  ki enplike nan trafik dwòg, blanchiman lajan, kidnapin ak finansman gang. Yo tout dwe pini”, se eksplikasyon pwofesé a. 

Ansyen Prezidan Michel Martelly, ansyen Premye Minis Laurent Salvador Lamothe, Senatè Joseph Lambert ak Rony Célestin, ansyen palmantè Jean Hervé Fourcand, Youry Latortue ak Gary Bodeau se politisyen peyi Kanada ak Etazina gentan sanksyone. 

Dapré sa peyi sa yo fè konnen, moun sa yo te enplike nan trafik ilegal dwòg, blanchiman lajan, koripsyon ak finansman aktivite gang an Ayiti. Se sak fè yo konfiske byen yo, yo jele byen yo epi yo te revoke viza yo.

Facebook Comments

- Advertisement -
Partagez cet article
Mackendy Filderice
Par Mackendy Filderice Rédacteur
Follow:
Étudiant en sciences politiques à l'Université Quisqueya, Journaliste-Rédacteur à Netalkolemedia, Publiciste, Humanitaire. Amoureux de la vie et de l'apprentissage.