Lapolis nan Lilavwa dechouke yon tantativ kidnapin epi sezi yon machin ki anrejistre sou non Konferans Episkopal Dayiti ki te anba dèyè bandi yo pandan tantativ sila a.
Nan kad siyonnen lapolis t ap fè nan zòn Lilavwa aprè midi dimanch 28 me a, ajan fòs lòd yo rive dejwe yon tantativ kidnapin nan zòn Lilavwa 14 (Bon Repo). Pandan kout filè sa, bandi yo jwenn chans chape poul yo anba grif polisye yo aprè yo ta rale zam sou yon chofè taksi moto. Yo vòlè moto a epi ale ak yon machin gri mak Hummer H3.
Se ajan Brigad entèvansyon (BI) ki nan komisarya Bon Repo a ki te kontrekare tantativ kidnapin sila a. Malfra yo abandone machin yo te itilize pou komèt zak kidnapin lan, ki se yon pikòp Toyota Hilux, koulè bèj ki anrejistre nan non Konferans Episkopal Dayiti.
Daprè sa lapolis pibliye sou paj ofisyèl yo, “Pou echape anba entèvansyon lapolis la, bandi yo rale zam sou yon chofè taksi motosiklèt epi yo vòlè tou yon machin gri Hummer H3”.
Pou kounya, machin bandi yo te itilize pou fè krim yo a nan pla men lapolis, pandan ankèt ap mennen nan sousi pou konferans Episkopal bay tout detay posib sou machin lan.
Kredi Foto: PNH
