Lèzetazini etann TPS la pou Ayisyen ki lakay li yo 

Pooshy Rosana
Pooshy Rosana  - Rédacteur
lèzetazini etann tps la pou ayisyen ki lakay li yo 

Gouvènman ameriken an anonse ayè lendi 05 desanm nan li pwolonje pou 18 mwa siplemantè pwogram Estati Pwoteksyon Tanporè (TPS) pou resòtisan ayisyen k ap viv lakay li yo. 

Pwolongasyon sila ap ekspire 03 dawout 2024 pwochen, sinon se nan dat 04 fevriye k ap vini la, swa an 2023, li t ap ekspire, daprè sa Depatman sekirite enteryè a fè konnen nan yon kominike, li presize se akòz « kondisyon ekstraòdinè ak tanporè » ki ekziste nan peyi Karayib yo ki fè gouvènman ameriken an deside pwolonje l. 

- Advertisement -
Ad imageAd image

Nan sans sa sekretè Sekirite enteryè a, Alejandro Mayorkas te tou pwofite deziyen Ayiti kòm yon peyi benefisyè TPS la, epi pèmèt sitwayen ayisyen ki rezide Ozetazini depi dat 06 novanm 2022 a, pou yo mande TPS la pou rive jis 03 dawout 2024, ak kondisyon yo ranpli kondisyon yo. 

Sepandan, Ayisyen ki rantre Ozetazini aprè dat 06 novanm 2022 a pa elijib pou TPS epi yo riske ekspilsyon si yo antre ilegalman Ozetazini. 

“N ap bay yon èd imanitè endispansab ak tout sitwayen ayisyen ki deja ap viv Ozetazini,” Alejandro Mayorkas te di, epi li ajoute “se kondisyon yo an Ayiti, tankou defi sosyo-ekonomik, enstabilite politik, vyolans ak krim gang, ki vin agrave pa dezas anviwonmantal la, ki fòse èd imanitè sa bay jodi a ». 

Pou gouvènman ameriken an, ki gen nan tèt li pou kounya prezidan Joe Biden, se akòz kriz politik manch long ki genyen aktyèlman an Ayiti ki fè yo pwolonje TPS la. Lèzetazini evoke suit ak desizyon sila, move sitiyasyon ekonomik peyi a, grangou ak lamizè ki genyen la, pa gen aksè ak dlo potab ak medikaman sitou depi aprè aparisyon kolera a, ak dènye tranbleman tè ki te pase an 2021 an, nan Gran Sid peyi a. 

N ap raple, Estati Pwoteksyon Tanporè (TPS) se yon estati imigrasyon Ozetazini.  TPS se pou moun ki pa ka retounen nan peyi yo akòz danje ki genyen la, tankou konfli ame, dezas anviwònman oswa lòt danje tanporè. Estati sa a disponib pou moun ki soti nan sèten peyi, pami yo Ayiti.  

Avantaj TPS la bay : 

-Ou ka rete legalman Ozetazini pou yon sèten kantite tan 

-Ou ka aplike pou yon pèmi travay 

-Ou ka aplike pou otorizasyon vwayaj pou ale andeyò Etazini 

-Ou pwoteje kont mezi detansyon ak depòtasyon 

N ap presize, ou pa kapab benefisye avantaj TPS anvan validasyon demann ou an paske li tanporè. Estati sila pa bay dwa pou rezide an pèmanans Ozetazini, epitou li pa akòde sitwayènte ameriken oswa lòt estati imigrasyon pèmanan legal ak benefisyè a. 

 

Facebook Comments

- Advertisement -
Partagez cet article
Pooshy Rosana
Par Pooshy Rosana Rédacteur
Follow:
Pooshy Rosana, journaliste-rédacteur à Netalkolemedia, caricaturiste et graphiste. Parallèlement, coach fitness. Adore la culture populaire, les documentaires et la musculation.