Nan premye anivèsè Akò 11 septanm pou Gouvènans Pasifik ak Efikas nan Peryòd Pwovizwa ki te siyen ant Premye Minis Ariel Henry ak pati politik yo, gwoup sosyete sivil òganize yo ak òganizasyon de baz yo, Premye minis la te pwofite bay yon diskou.
Nan moman diskou bay nasyon an, newochirijyen an te revize etap yo te pran pou eseye pote lòt gwoup sou tab negosyasyon an, epi fè anons konsènan eleksyon nan peyi a, lokatè Primati a te mete aksan sou tranzisyon demokratik la, epi li fè konnen li pa gen entansyon kenbe pouvwa a endefiniman.
« Avan fen ane sa a nou dwe mete peyi a nan mòd elektoral epi pèmèt tout moun ki vle pran direksyon zafè peyi nou an patisipe nan yon konpetisyon an sante ak demokratik » , deklare doktè Ariel Henry ayè 11 septanm nan, nan yon diskou bay nasyon an, avan li kontinye pou li di “Mwen repete pou tout moun isit la ak lòt kote ki di mwen gen entansyon kenbe pouvwa a, sa a se fo epi yo konnen li trè byen ».
Yon lòt bò, Premye minis Henry fè konnen si se pat gang k ap simen laterè, ak difikilte pou bay lapolis nasyonal ekipman ak materyèl yo bezwen pou yo aji byen epi retabli lapè, li ta p deja lanse konsiltasyon yo pou fè chanjman ki nesesè nan konstitisyon an epi fè aranjman pou òganizasyon eleksyon yo.
Mete sou sa, Ariel Henry, di tan kote yo te ka atake pouvwa epi enpoze volonte yo sou pèp ayisyen an pa fòs la, pa la ankò, li di tou sou baz chwa demokrasi pèp la te fè depi 1987, moun ki pè eleksyon yo dwe konnen yo pa gen okenn chans pou yo reyalize lidèchip peyi nou an.
Se sak fè, Premye minis la mande tout moun ki vle jwe yon wòl politik pou yo prepare pou yo chèche konsekrasyon popilè nan bwat vòt yo epi li fè konnen tou li rete ouvè pou li diskite ak tout Demokrat yo sou fason pou mete kanpe estrikti elektoral kredib, san patipri ak transparan nan peyi a avan fen ane 2022 a.
Facebook Comments