Senegal fè yon bèl viktwa (1-3) anfas peyi òganizatè a, Kata, 25 Novanm nan. Se premye peyi Afriken ki genyen yon match nan 22è edisyon Mondyal la.
Senegal te mal antre nan Mondyal 2022 lè l te tonbe devan Lawoland aprè yon dividal okazyon l te rate pou l te fè gòl. Lyon Téranga yo te pèdi (2-0), men jodi a yo siye san an sou peyi òganizatè konpetisyon an avèk viktwa (3-1).
Se Boulaye Dia ki te bay jwè Aliou Cissé yo avantaj la nan fen premye mitan an (41′). Senegalè yo ta pral fè brek la avèk Diedhiou (48′). Se premye fwa 2 jwè sa yo fè gòl pou peyi yo nan zafè Mondyal.
Ekip Kata a te vin oblije sekwe kò l paske l te santi eliminasyon an pwòch. Aprè kèk okazyon rate, yo te jwenn rediksyon eskò a gras ak Mohamed Muntari ki te fenk antre nan match la (78′). Se 13è gòl li fè pou Kata.
Jwè Olympique de Marseille la, Bamba Dieng te vin touye espwa Katari yo kèk minit aprè (84′). Li repran yon balon nan kare a pou l sele viktwa a pou Senegal. Lyon Téranga yo ap jwe dènye match yo nan poul la ak Ekwatè.
