Chèf Vatikan an, Pap François, anonse jodi mèkredi 28 desanm 2022 an agravasyon eta sante Benoît XVI, ki te renonse ak fonksyon li kòm pap nan lane 2013 pou rezon sante. Yon nouvèl ki te siprann mond lan tout antye.
Benoît XVI ki gen 95 lane aktyèlman ap fè fas ak yon konplikasyon sante depi plizyè lane kote pou peryòd fen ane an li vin pi grav. Daprè pap François, ansyen chèf Vatikan an malad grav anpil.
Otorite Vatikan yo konfime jodi mèkredi a agravasyon eta sante ansyen pap Benoît XVI ki gen 95 lane, pandan yo presize teyolojyen alman an rete sou siveyans medikal kote pap aktyèl la François premye te rann li vizit.
«Mwen ka konfime pandan dènye lè sa yo genyen yon agravasyon nan eta sante l ki gen pou wè prensipalman ak laj li ki avanse. Sitiyasyon an rete pou kounya sou kontwòl kote medsen yo ap swiv li an pèmanans», anonse nan yon kominike direktè sèvis près Vatikan an, Matteo Bruni.
Yon ti kras tan avan, chèf Vatikan an te anonse pap ki te vin avan l lan, Benoît XVI, malad grav anpil e l ap priye pou li k ap soufri ak maladi depi anviwon 10 zan, sa ki te pouse l renonse ak fonksyon papote an an 2013.
Pap François ki gen bon non Joseph Ratzinger te renonse ak chaj li yo nan Vatikan an 2013 akoz deteryorasyon eta sante l. Depi lè sa, pap François ap viv retrèt li nan yon monastè ki twouve l nan jaden Vatikan an.
